إفضل فرط في حقك، وقول على نفسك طيب، لغاية ما يدوسوا عليك .. يا عبيط.

باقي أقل من شهر وتنتهي قصتي مع المدينة الجامعية، بعد علاقة استمرت ٧ سنين، قعدت فيهم في المدينة اكتر من بيتنا بنسبة ٨٠ ٪ من الوقت في المدينة و٢٠ ٪ بس في البيت ،

لسا فاكر تفاصيل اول يوم جيت فية المدينة، ودخلت الاوضة، وتفاصيل اول ناس قابلتهم وقعدت معاهم، وكنت جاي عامل ازاي، وشخصيتي عاملة ازاي، وقد اية كنت هش، وقليل الخبرة ف حاجات كتير ..

٧ سنين كل حاجة اتغيرت فيهم، دخلت هنا شخص وهخرج شخص تاني، المدينة مرتبطة معايا ببدايات كل حاجة كبيرة في حياتي، كانت شاهدة على كل حاجة، علاقات، مذاكرة، اجتهاد، احباط، عياط، فشل، نجاح، حب، مرمطة، شغل، حزن، صحاب، وحاجات تانية كتير ،

المدينة ك مكان ف هي مش الجنة خالص 😂 وتقرف على مستويات كتير، بس هو مش بالمكان فعلا، وهمشي منها مش هفتكر كل القرف اللي عشتة فيها ك مكان، بس كل اللي هفتكرة كمية الذكريات و والمشاعر والاشخاص اللي عاشوا معايا فيها والقصص اللي عشتها على مدار السنين دي كلها، عشان نبدا فصل جديد ومرحلة جديدة في مكان تاني ..

ايه هي الحاجة العبيطة اللي بتحسسكم بالأمان؟

بالنسبالي وجود فلوس فكة ف جيبي وانا ماشي.

موضوع ان العيانين اللي بتقعد معاهم بالشهور، وفجأة تروح الشيفت تلاقيهم ماتوا، ومتملاش الفايلات بتاعتهم تاني خلاص دا حزين اوي.

الدنيا دي صعبة اوي ومليانة مآسي، والواحد صغير اوي، والاحداث اكبر من الواحد وقدرتة على الاستيعاب، المطلوب كتير اوي، الموضوع صعب.

بقيت بستنى ليلة الخميس بفارغ الصبر، وبستنى الشيفت يخلص وأروح اوصل السرير واقعد براحتي عشان تاني يوم أجازة ومفيش شغل، كبرت كدا امتى؟🥺😭

بقالي فترة عايز أشتري كروكس جديد، وكل العروض عبارة عن خصم ٦٠٪ على الكروكس، وسعرة بعد الخصم ١٤٠٠ جنية، يا بلاش 🤩

واقف بشتري شوية طماطم وخيار، وفي واحد بيقول للست انا عايز آخد توماية " مفرد ثوم" ، هو التوم بكام كدا ؟، قالتلة ب 80، انا تلقائي بصيت للراجل، ولقيت الراجل بيبصلي وضحكنا إحنا الاتنين ومشينا في صمت :D

بقت كلها أشياء لا تشترى بجد.

اللي قال دا الصبر لوحده محتاج صبر، فاهمك عامةً.

حلمي بسيط، شغل بيخلص الساعة ٢ الضهر، وأم العيال تعملنا الشاي،

والله طلبات الإنسان قد كدا 🤏🏻

الله يسلمك يا أنون ♥️

ثانكيو والله تسلم، مبقتش افتح هنا خالص بقالي شهور والله بس لما الدنيا بتقفل معايا خالص رجلي بتجبني لهنا تلقائي كدا :D

تبقى معدي كل المشاكل الكبيرة ومهاندل الدنيا كويس - او فاكر كدا - لغاية ما تيجي تفصيلة صغيرة تجيبلك الأرض وتحسسك إن كل حاجة غلط.

إن الواحد يبقى حاسس بنفسه في المحيط اللي حوالية دا نعمة مش موجوده عند كتير من الناس.

بدأت ألاحظ ان كل الناس اللي فاكرين نفسهم ضحايا، او ان هما حواليهم ناس مؤذية ومش كويسين ومخليين حياتهم اصعب، ان المشكلة كلها طلعت في الشخص دا نفسه، هو اللي مخلي كل حاجة كدا حوالية، هو اللي دماغة تعبانة مش اكتر، ومخلياه موهوم بدا.

فكرت قبل كدا إن مش انت اللي صح زي ما انت فاكر ؟ وإن انت مش الشخص الكويس اللي انت فاكره ؟ وإن انت الشخص اللي مزعل الناس، مش اللي المفروض تبقى زعلان من الناس، وإن انت الشخص اللي وجودك تقيل على اللي حواليك، مش اللي حاسس ان الناس تقيلة عليه؟